Psalm 64

The Hurtful Tongue

¹In finem. Psalmus David. Exaudi, Deus, orationem meam cum deprecor; a timore inimici eripe animam meam.

²Protexisti me a conventu malignantium, a multitudine operantium iniquitatem.

³Quia exacuerunt ut gladium linguas suas; intenderunt arcum rem amaram,

⁴ut sagittent in occultis immaculatum.

⁵Subito sagittabunt eum, et non timebunt; firmaverunt sibi sermonem nequam. Narraverunt ut absconderent laqueos; dixerunt: Quis videbit eos?

⁶Scrutati sunt iniquitates; defecerunt scrutantes scrutinio. Accedet homo ad cor altum,

⁷et exaltabitur Deus. Sagittæ parvulorum factæ sunt plagæ eorum,

⁸et infirmatæ sunt contra eos linguæ eorum. Conturbati sunt omnes qui videbant eos,

⁹et timuit omnis homo. Et annuntiaverunt opera Dei, et facta ejus intellexerunt.

¹⁰Lætabitur justus in Domino, et sperabit in eo, et laudabuntur omnes recti corde.